Menu
Una proposta “forte” per il futuro della valle, che parte dal rifiuto una politica fatta di urla e ingiurie. Il coraggio di dire le cose come stanno, per difendere le conquiste di autogoverno per la comunià di Fassa e per lanciare idee e prospettive ambiziose su mobilità e sviluppo della valle. Aprire il movimento a forze nuove e a persone capaci e entusiaste, anche di altra provenienza.
Non possiamo perdere questa occasione per cambiare!
Questa di Luciana da Pont è la miglior risposta a chi propone di stare alla finestra ad aspettare gli eventi…
Stimé duc,
Volesse dir zeche en cont de la prejentazion de liste par le litazion da chest an che vegn.
L prum pensier l’é che te chisc ultimes 20 egn l’é piorà debel la calità de la politica. Endana le campagne litale vegn metù dant programes ambizious che en ultima no i vegn metui en doura nience per n cart de chel che i empromet, per no rejonar di “toni” de le campagne litale, olache le ofenude personale le à tout l post de n confront leal pojà su le idee e su le proponete par l ben de la jent.
Enceben che l’é da pech mudà l Goern no se pel amò dir de se aer librà da na vida de far politica che co la politica no l’à dassen nia da che veder: tant a livel nazional che local vegn troà fora ogne dì zachei o zeche da desprijiar e vegn engaissà la populazion di “social”, par sconer via l fat che no l’é nia da concret da meter dant, se no de jir semper più endò (basta veder che che l’é stat proponet chest ultim an en cont de familie, femene, jent che vegn da dalonc e co la pel de n auter color, mond Lgbt e coscita inant).
Noi persone zivile cognon se parar da chesta politica de cighes e ofenude, con serietà e proponete concrete e da poder meter en doura.
Fosc te chest moment l’inom UAL e sie segnificat no i conta più trop per i fascegn, cognon entener chest tant e l’azetar. L’autonomìa per chela che se aon tant batù l’aon ciapada, aon na Scola ladina che ne envidia duc, aon corsc de lengaz per la jent grana, aon l Comun General de Fascia recognosciù a livel costituzional enveze che l Comprenjorie de Fiem e Fascia e… la jent de Fascia la conscidra dut chest con indiferenza, se no adertura con dejaje, canche i genitores cogn dezider se manar i bec a la scola con più ore per ladin o con de manco, e canche l’é ora de jir a litar i aministradores del Comun General, che l vegn vedù desche n ent che no serf a nia. Coscita à ciapà pè sorì certe proponete de tor jù l Comun General, la scola per ladin e coscita inant: per grazia no le à abù ejit, ma chest tant ge vel se l tegnir a ment.
Mia proponeta, te chest moment sci grief e senester, l’é na proponeta che domana coraje:
Ge vel aer l coraje de dir le robe coche le é, se no volon se la ciapar te n comedon ence staùta e se parar da chi che disc fora demò “slogan” zenza contegnù bele per tor sù stime.
Ge vel aer l coraje de meter dant n organism nef, con a ciaf jent neva, con n grop de joegn che die fora che che i peissa e che che i vel, con n program de livel aut, sorafora i cinch egn de la legislatura, che tole ite duc i aspec de la vita soziala, dai besegnes di impiantisć a chi del lurierant de la scola che vegn da Trapani e no l troa n cartier da jir a star.
Ge vel aer l coraje de se destacar, tant co le parole che coi fac, da na vida de far politica che la é dò a ne portar duc chenc te n stravert da olache sarà beleche empossibol vegnir fora.
Ge vel aer l coraje de meter dant proponete forte, ence mingol da mac volesse dir, desche se tacar te la Provinzia de Busan o studiar fora zacan na mobilità neva, neta e sorida par noscia val sofoada dal trafich e entesseada de duc i versc. Sé ben che de dut chest l’é stat rejonà più e più oute, tant ta le radunanze dal Moviment Ladin de Fascia che – me fegure – te chele de la UAL che te Comun General, ma da n ultima no l’é mai vegnù fora nia da concret: ades l’é ruà l moment de se meter dant e de mosciar che aon n pensier par l davegnir de noscia val.
Ge vel aer l coraje de tor ite ence jent che magari enscin ades la era te autre liste, parcheche no se é stac svelti assà a ge domanar, jent che à de bone idee e no demò la gaissa de aer na cariega. En cont de chest l Moviment Ladin de Fascia l’aea tacà a verjer n troi, ma dapò l se à fermà.
Sion te n moment grief, emportant e delicat: no podon verjumar chesta ocajion!
Ve pree duc chenc de lasciar da na man stritarìe e personalismes e de meter adum n grop che ciape la stima de la jent, n grop de jent seria, enjignada, ma soraldut engaissada par doventar n ejempie ence par le autre valade, par meter dant proponete neve e no par ge corer dò a chel che fasc i etres. Ben segur, l Südtirol pel esser n ejempie par noi, ma podon pa ence far de miec, se demò che volon.
N salut e n braciacol
Luciana Detomas da Pont