Recordanza de Hevrîn

Recordanza de Hevrîn

In chiusura del dibattito “Global / Local” sul futuro della valle, un pensiero per ricordare l’attivista curda massacrata dalle milizie filo-turche a causa del suo impegno per la convivenza pacifica, per i diritti delle donne e per la libertà del suo popolo.

Dall’Amazzonia al Kurdistan, uno sguardo sul mondo per rinsaldare i valori di solidarietà e la cultura del “Ben Comun” che da sempre hanno caratterizzato la nostra comunità.

 

******

hevrin-khalafStimada jent,

te chesta ocajion, olache se à rejonà e se rejona del davegnir, volesse recordar na persona che per l davegnir de sie popul e de sie paìsc à dat la vita. L’aea inom Hevrîn Xelef (Khalaf), sassinada barbaramenter dò strada, de 35 egn, ai 12 de otober de chest an, dessema con si compagnes che se batea contra l’oprescion del popul curdo e contra la vera en Siria.

No sarà più davegnir per Hevrîn, ma so ensome de pasc e libertà no morirà fin canche sarà zachei che recordarà so inom.

Jent, cognon duc emparar delvers chest inom, Hevrîn Xelef, e se l tegnir strent tel fon del cher: ve l die a voetres, joegn de “FridayForFuture”, ve l die ence a voautre femene del grop “Recamon l davegnir”. Ence Hevrîn aea a cher l davegnir, fondadora e co-segretaria generala del “Partit per la Siria del davegnir” (i Curdi met semper doi persone a ciaf de si organisazion, n om e na femena: auter che “quote rosa”…). Ence ela aessa volù “recamar” n davegnir seren e lumenous per sia tera, col dialogh pazient e ascort anter popui, etnie e religion desferente, con spirit de valivanza anter om e femena, col didament per i più deboi, i bec e i veies,… e zenza vera, zenza violenza, ma col respet di deric de duc, co la cognoscenza, la speranza e l’amor per la cultura.

L’aessa podù lurar de enjenier, con tanta de laurea, magari al segur a la foresta, ma l’à cernù de star anter sia jent, a sostegnir la causa del Popul Curdo, a defener i deric de le femene e a se bater per la pasc.

N scandal, na “pacifista”, te na tera martoreada dal fanatism e da l’odie etnich, n scandal amò più gran che veder touse combater te la milizia volontaria de n popul mai domà; descheche l’é n scandal l’esistenza medema di Curdi, n ejempie de democrazia, autogovern, convivenza e solidarietà, n popul spartì da confins volui dai potenc, perseghità e manacià de sterminio per l sfrutament del teritorie (desche i Indios de l’Amazonia), n scandal da destrigar più prest che en prescia. Co la complizità impotenta de l’Ozident.

No sarà più davegnir per Hevrîn Xelef, ma so ensome de pasc e libertà no morirà fin canche sarà zachei che recordarà so inom.

 

Ai 26 de otober 2019

(fch)