Sacotant temp l’é passà da canche Fascia la se à fermà. Ma te chisc dis dut à tacà endò a fèr i prumes vèresc: la boteighes à orì endodanef. Chest setor l’é un di pilèstres fondamentèi de noscia economia, e zenz’auter l’é stat un di partimenc che à padì de più te chisc meisc, dessema ai hotìe, i bares e duta la ativitèdes tel ciamp de la restorazion e di servijes. Ampò, la fasa più senestra no la é fenida.
Tempes desche chi che sion dò a viver, i ne dèsc l met de mudèr la percezion de nosc ambient da duc i dìs, ajache beleche nia l’é più desche dant. I Fascegn, desche dut l rest de la Tèlia e gran pèrt del mond, i é stac ciapé ite da n nemich che no se veit, tegnic e rie. Ades l’é ruà per duc chenc l moment de desmostrèr che noscia comunanza fascèna la é bona de se uzèr endodanef, con maor consapevoleza te sia potenzialitèdes no demò economiches, ma sozièles e solidales.
Comerzianc, hotelieres, barisć e duc i operatores i é dantdaldut Fascegn: persones che se dèsc jù vigni dì per tegnir sù l’economia de noscia val, e che soraldut dèsc garanzia de competenza e de maniera. La profescionalità che caraterisea la jent de Fascia no la cognosc dificoltèdes, ajache l spirit de adatament l’é semper stat un di valores più auc de noscia jent.
Sessaben che duc i momenc senestres i se porta dò padimenc, spartijons e burta desgrazies. Ampò, chesta sort de esperienzes les é bones de aer l’efet revers: fèr arvejinèr duta la persones de na comunità. Chel che deida la jent a se tirèr apede un co l’auter l’é l’obietif comun che ogne un de nos l’à: tachèr endodanef a lurèr, a viver en sozietà, a se sentir na pèrt fondamentèla de noscia comunanza, envers chela che sarà na “neva normalità” per i meisc e i egn che à da vegnir.
Per ge fèr front al mudament che ne à tout ite duc chenc, la Neva UAL, dessema a la comunanza de Fascia, se dèsc jù de séghit per engaissèr noscia jent a doventèr la protagonista de n nef scomenz. Jir a proveder te la boteighes de noscia val l’é un di vèresc più emportanc per tegnir sù noscia economia dassen proèda da chesta emergenza. Jir a proveder te Fascia no demò ades, ma dut l’an, vel dir aer a cher i valores più scempies e più gregn che noscia identità la ne dèsc: determinazion, estro de fèr e vijion per l davegnir.
Consei de la Neva UAL
